15/08/2024
Dil-e-Majrooh se tooti hui barchi nikalti hai
Jawani Mustafa(sawaw) ki aakhri karwat badalti hai
Dil-e-majrooh se tooti hui barchi nikalti hai.....,
Ali Akbar(as) gaye Laila(sa) ke kheme mein andhera hai
Na koi baat kerta hai na koi Shamma jalti hai
Dil-e-majrooh se tooti hui barchi nikalti hai.....,
Koi ye aasmaan-e-Hashmi ke chaand se keh de
Tumhara raasta tak te kisi ki raat dhalti hai
Dil-e-majrooh se tooti hui barchi nikalti hai.....,
Ilaahi khaer baagh-e-Fatima Zahra(sa) ke pholon ki
Zami'n sholay ugalti hai hawa bhi garm chalti hai
Dil-e-majrooh se tooti hui barchi nikalti hai.....,
Wuzu ke waaste paani nahi hai khema-e-Shae(as) mein
Imamat apne chehre per pisar ka khoon malti hai
Dil-e-majrooh se tooti hui barchi nikalti hai.....,
Jawan bete ka laasha la rahe hain Shaah(as) kheme mein
Ajab manzar hai peeri ladkhadati hai sambhalti hai
Dil-e-majrooh se tooti hui barchi nikalti hai.....,
Pukari Ma'n kaleja munh ko aata hai Ali Akbar(as)
Kisi kadiyal jawa'n ke byah ki jab baat chalti hai
Dil-e-majrooh se tooti hui barchi nikalti hai.....,
Dar-e-Sarwar(as) pa Kazim aa gaya hoon haath phailaye
Bashar kya hai farishton ki yahan qismat badalti hai
Dil-e-majrooh se tooti hui barchi nikalti hai.....,
(Kazim Jarwali )
