22/09/2021
Misra e Tarah "Lahu ki dhaar ko shamsheer kar gaye hain Hussain(as)
Woh Karbala jise tameer kar gaye hain Hussain(as)
Zami'n ko Khuld ki tasveer kar gaye hain Hussain(as)
Zami'n Khareed ke Saunpi hai Karbala hum ko
Hamare naam ye jageer kar gaye hain Hussain(as)
Bata gaye hain Woh Jeene ka Falsafa humko
Shahadato'n ki bhi Tafseer kar gaye hain Hussain(as)
Na ab mitega kabhi La Ilaha Illalaah
Dilo'n pa khoon se tahreer kar gaye hain Hussain(as)
Sirat e Haq pa Bahattar Charagh Raushan hain
Jina'n ki raah mein Tanveer kar gaye hain Hussain(as)
KHitaab aisa milega, na ab Khateeb aisa!!
Sina ki nok se taqreer kar gaye hain Hussain(as)
Mita nasheb mein saara Ghuroor Paani ka
Baland Pyas ki Tauqeer ker gaye hain Hussain(as)
Siyaah Raat ko Suraj ne jaise kaat diya
Sitam ki Fauj ko yu'n Cheer ker gaye hain Hussain(as)
Nigaahe Fatima Zahra(sa) mein sab barabar hain
Har ek Shaheed ko Shabbir(as) ker gaye hain Hussain(as)
Sharaf Imam(as) ke humraah Ran mein jaane ka
Bara e Asghar e Besheer(as) ker gaye hain Hussain(as)
Ujala Subh e Imamat ka ho gaya Azaad
Hawa e Zulm ko Zanjeer kar gaye hain Hussain(as)
Supurd Ahle Haram ke Saro'n ko Ashko'n mein
Rida e Aya e Tatheer kar gaye hain Hussain(as)
Bahae kyun na Jalal apna khoon matam mein
Lahu ki dhaar ko Shamsheer kar gaye hain Hussain(as)
