20/06/2026
Dushman ko bhi maloom tha Sarwar ka jahan hai…
Hum shakl-e-Payambar hai ye Shabbir ki jaan hai
Aapas mein kar rahe the sitamgar ye mashwara
Sarwar ko maarna hai to Akbar ko maar do
Marna hai is jawan ka marna Hussain ka
Sarwar ko maarna hai to Akbar ko maar do
Kaante pare hain pyaas se iski zabaan par
Lekin taras na khaiyo Sarwar ki jaan par
Peechhe se chhup ke waar karo is jawan par
Hoga ye waar Muttalabi khandan par
Bach kar na jaane paaye ye tasveer-e-Mustafa..
Sarwar ko maarna hai to Akbar ko maar do
Aage barho Rasool ki kheti ujaad do
Naiza jawan laal ke seene mein gaar do
Zahra ke aur Ali ke kaleje ko phaad do
Jaldi karo Hussain ki saansein ukhaar do
Mar jaayenge Hussain agar ye juda hua..
Sarwar ko maarna hai to Akbar ko maar do
Sabr o Raza ki had se guzar jaayenge Hussain
Lekin pisar ka daagh na seh paayenge Hussain
Aisa jigar kahaan se bhala laayenge Hussain
Akbar ki laash dekh ke mar jaayenge Hussain
Un ko shikast dene ka hai ek raasta..
Sarwar ko maarna hai to Akbar ko maar do
Humshakl-e-Mustafa hai, niraala hai ye jawan
Ye bhi rahe khayaal ke aala hai ye jawan
Zahra ke poore ghar ka ujala hai ye jawan
Bint-e-Ali ki god ka paala hai ye jawan
Is naujawan mein hai basa dil Hussain ka..
Sarwar ko maarna hai to Akbar ko maar do
Athaara saal paal ke jis ko jawan kiya
Woh dilbar-e-Hussain hai humshakl-e-Mustafa
Ek baap ke liye hai ye sadma bohat bara
Bete ka sehra dekh na paayen Shah-e-Huda
Inaam tum Yazid se lena bohat bara..
Sarwar ko maarna hai to Akbar ko maar do
Chaaron taraf se gher ke maaro ise sina
Dil tak jo jaaye tor ke Akbar ki pasliyan
Dekhen jo zakhm Shah to nikle badan se jaan
Ho jaayen iss diyaar mein be-aas be-amaan
Akbar ke baad jee nahin sakte Shah-e-Huda..
Sarwar ko maarna hai to Akbar ko maar do
Yawar koi nahin hai woh kis ko bulaayenge
Tanha Hussain laasha-e-Akbar pe aayenge
Jab apne naujawan ko zinda na paayenge
Khud maut ko Hussain gale se lagaayenge
Khanjar ko saunp denge woh sookha hua gala..
Sarwar ko maarna hai to Akbar ko maar do
Sarwar ko ek pal na sukoon aur qaraar do
Iss sakht imtihaan se Sheh ko guzaar do
Pusht-e-faras se khaak pe iss ko utaar do
Barchhi uthao seena-e-Akbar pe maar do
Tukde kaleja hoga isi gham se dekhna..
Sarwar ko maarna hai to Akbar ko maar do
Maqtal ki simt daurte jaate rahe Hussain
Aankhon se khoon ke ashk bahaate rahe Hussain
Girte the jab to khud ko uthaate rahe Hussain
Ro ro ke ye sada bhi lagaate rahe Hussain
Abbas fauj-e-Shaam ka naara suno zara..
Sarwar ko maarna hai to Akbar ko maar do
Waiz bhi ashkbaar hai, Mesum bhi noha gar
Mazhar bhi ro raha hai Hussain-e-Ghareeb par
Sun kar bayan ye rota hai Surani har bashar
Baithe laeen chain se Akbar ko maar kar
Lekin fiza mein goonj rahi thi yahi sada
Sarwar ko maarna hai to Akbar ko maar do
