Jang e Khandaq - Khandak Ka waqya Hai ye Khandak Ka waqya
16/01/2023
Haider Ki Zulfiqar Ke Johar Dikhaon Gaa.
Khundak Na Khaein Aap Main Khandaq Sunaon Gaa.
Ali(a.s.) Ali(a.s.) Ali(a.s.) ALi(a.s.)
Khandak Ka waqya Hai ye Khandak Ka waqya.
1- Khandaq Mein Dekhney Ko Musalman They Bahot.
Zahir Mein Sab Rasool Pe Qurban They Bahot.
Waisay Tu Woh Nabi Ke Nigehban They Bahot.
Bas Ibn-e-Abad-e-Wod Se Pareshan They Bahot.
Hastay They Unn Ko Dekh Ke Kuffar Mauj Mein.
Kuch They Ohad Ke Bhagney Walay Bhi Foaj Mein.
Ali(a.s.) Ali(a.s.) Ali(a.s.) ALi(a.s.)
Khandak Ka waqya Hai ye Khandak Ka waqya.
2- Lashkar Mein Aisay Mard Bhi Aaye They Be Misaal.
Aata Tha Sirf Khaimay Ke Andar Unhein Jalaal.
Kartay They Yaad Dil Mein Woh Jang-e-Ohad Ka Haal.
Bhagay They Aisay Sansein Abhi Tak Na Thin Bahaal.
Iss Bar Tou Ajeeb Hai Aafat Pari Hoi.
Pichey Hai Khayi Aagay Hai Khandaq Khudi Hoi.
Ali(a.s.) Ali(a.s.) Ali(a.s.) ALi(a.s.)
Khandak Ka waqya Hai ye Khandak Ka waqya.
3- Kehte They Dil Hi Dil Mein Woh Salman Ko Bura.
Oss Ne Hamarey Sath Yeh Acha Nahi Kiya.
Kyun Mashwara Rasool Ko Khandaq Ka De Diya.
Ajmi Ne Inteqam Yeh Arbon Se Le Liya.
Sarkar Ne Suni Nahi Aakhir Kissi Ki Baat.
Phir Aaj Baton Baton Mein Rakh Li Ossi Ki Baat.
Ali(a.s.) Ali(a.s.) Ali(a.s.) ALi(a.s.)
Khandak Ka waqya Hai ye Khandak Ka waqya.
4- Guzrey Hain Chaar Saal Hi Iss Baat Ko Abhi.
Laye They Pehli Bar Issay Bazm Mein Ali.
Ab Jitna Yeh Qareeb Hai Utna Nahi Koi.
Our Aaj Tu Hadees Bhi Irshad Ho Gayi.
Waqif Azal Se Hai Yeh Hamarey Mizaj Se.
Salman Ahl-e-Bait Mein Shamil Hai Aaj Se.
Ali(a.s.) Ali(a.s.) Ali(a.s.) ALi(a.s.)
Khandak Ka waqya Hai ye Khandak Ka waqya.
5- Kehte They Bees Roz Se Yeh Tees Mar Khan.
Kuch Hain Poraney Dost Bhi Aaye Hoye Yahan.
Aapas Mein Achi Baat Nahi Hain Laraiyaan.
Kuch Tu Karein Khiyal Hamara Sheh-e-Zamaan.
Aisa Na Ho Keh Rishta Porana Yeh Toot Jaye.
Aye Kash Sulha Kar Lein Nabi Jan Choot Jaye.
Ali(a.s.) Ali(a.s.) Ali(a.s.) ALi(a.s.)
Khandak Ka waqya Hai ye Khandak Ka waqya.
6- Ek Roz Amar Ne Yeh Dikhai Bahadari.
Khandaq Ko Paar Kar Ke Idhar Aa Gaya Shaqi.
Khaimon Ke Pas Aa Ke Yeh Aawaz Oss Ne Di.
Itnay Ho Ek Mard Bhi Tum Mein Nahi Koi.
Baithay Hoye Hain Khaimon Mein Munh Ko Chupaye Hain.
Kya Aurton Ko Sath Nabi Le Ke Laye Hain.
Ali(a.s.) Ali(a.s.) Ali(a.s.) ALi(a.s.)
Khandak Ka waqya Hai ye Khandak Ka waqya.
7- Phir Aik Bar Bola Sitamgar Dahaar Kar.
Emaan Hai Tumhara Suna Hai Jehad Par.
Maro Ya Marey Jao Gay Maidan Mein Agar.
Janat Mein Tum Ko Milna Hai Apne Khuda Se Ghar.
Lo Main Khara Hoon Apna Muqadar Sanwar Lo.
Mar Jao Mere Hath Se Ya Mujh Ko Mar Lo.
Ali(a.s.) Ali(a.s.) Ali(a.s.) ALi(a.s.)
Khandak Ka waqya Hai ye Khandak Ka waqya.
8- ALLAH Re Us Ka Khaof They Khamosh Sab Ke Sab.
Danton Talay Zaban Thi Our Sil Gaye They Lab.
Din Mein Andhera Cha Gaya Aankhon Mein Misal-e-Shab.
Nagah Aagay Aaya Woh Gustakh Be Adab.
Munh Tak Rahi Thi Maut Bhi Us Be Usool Ka.
Naizay Se Chak Kar Diya Khaima Rasool Ka.
Ali(a.s.) Ali(a.s.) Ali(a.s.) ALi(a.s.)
Khandak Ka waqya Hai ye Khandak Ka waqya.
9- Gustakh Ne Yeh Be Adabana Kiya Jo Waar.
Kuch Our Dar Ke Hat Gaye Ashab-e-Janisar.
Uth Uth Ke Dekhney Lagi Pehlu Se Zulfiqar.
Aisa Howa Tha Door-e-Payamber Mein Pehli Bar.
Tha Ibn-e-Abad-e-Wod Ka Sitara Zawwal Mein.
Rehmat Ko Kainat Ne Dekha Jalal Mein.
Ali(a.s.) Ali(a.s.) Ali(a.s.) ALi(a.s.)
Khandak Ka waqya Hai ye Khandak Ka waqya.
10- Aakhir Khuda Ki marzi bata di Rasool(a.s.) Ne.
Allah Ke Ali(a.s.) ko sada di Rasool(a.s.) ne
Apna amama apni aba di Rasool(a.s.) ne
Pehlu me zulfeqaar saja di Rasool(a.s.) ne
Shere khuda jehaad ko tayyar ho gaye
Ek waqt me do Ahmad-E-Mukhtaar Ho gaye
Ali(a.s.) Ali(a.s.) Ali(a.s.) ALi(a.s.)
Khandak Ka waqya Hai ye Khandak Ka waqya.
11- Ban kar reza Nabi ki Ali(a.s.) Murtaza Chale
Tha Hukm Buturaab se Peeche Qaza Chale
Apna shikaar karne ko Sher-E-Khuda Chale
Kehte hue zaban se Ya Fatema(s.a.) Chale
Is naam ke tufail jo chahe Abu Turaab
Khandaq Kya Kaenaat Ulat de Abu Turaab
Ali(a.s.) Ali(a.s.) Ali(a.s.) ALi(a.s.)
Khandak Ka waqya Hai ye Khandak Ka waqya.
12- Mai Ibne abdwat hoo.n pukaara wo be khabar
Bole Imaam Hum Abutalin(a.s.) Ke hai pisar
Jaari rajas tha dono taraf se ba karr-o-far
Us samt kull-E-Kufr Tha Imaan-E-Kul Idhar
Usne kaha laat-o-hubal ka badan hoo.n mai
Mola Pukaare Dekh le Phir But Shikan Hoo.n Mai
Ali(a.s.) Ali(a.s.) Ali(a.s.) ALi(a.s.)
Khandak Ka waqya Hai ye Khandak Ka waqya.