09/07/2026
Koi Mere Bhai Ko Aa Kar Bacha Le
Tadap Kar Ye Kehti Thi Sarwar Ki Khwahar,
Koi Mere Bhai Ko Aa Kar Bacha Le.
Koi Rok Le Is Sitamgar Ka Khanjar,
Koi Mere Bhai Ko Aa Kar Bacha Le.
Badi Mehnaton Se Meri Maa Ne Pala,
Main Bhooli Nahin Unke Haathon Ka Chhala.
Chala Kar Ke Chakki Khilaya Niwala,
Ise Maa Bulati Thin Ghar Ka Ujala.
Ujad Jaayega Fatima Ka Bhara Ghar.
Koi Mere Bhai Ko Aa Kar Bacha Le.
Ibn-e-Saad Tujhko Ye Kya Ho Gaya Hai,
Tu Kaise Sitam Ye Khada Dekhta Hai.
Nabi Ne Jise Apna Beta Kaha Hai,
Laeen Uska Sookha Gala Kaat Ta Hai.
Hai Khanjar Tale Bosa-Gaah-e-Paighambar.
Koi Mere Bhai Ko Aa Kar Bacha Le.
Musafir Ko Narge Se Koi Nikale,
Ghareeb-ul-Watan Hi Samajh Kar Bacha Le.
Kisi Dhaal Se Khasta Tan Ko Chhupa Le,
Bahut Sangdil Hain Sitam Karne Wale.
Baraste Hain Pyaase Ke Zakhmon Pe Patthar.
Koi Mere Bhai Ko Aa Kar Bacha Le.
Bata De Koi Ja Ke Zaalim Ko Itna,
Khudara Kare Na Sitam Ye Dobara.
Hilaye Na Pahlu Mein Paiwast Neza,
Khadi Hai Wahan Ek Pahlu Shikasta.
Tadapti Hai Is Zulm Se Meri Madar.
Kabhi Pyar Se Paas Apne Bitha Ke,
Jo Zulfen Sawarin Thin Maa Fatima Ne.
Laeen Kheenchta Hai Woh Zulfen Pakad Ke,
Lagata Hai Bekas Ke Munh Par Tamaache.
Koi Rok Le Shimr Ka Haath Badh Kar.
Zaeefi Mein Bete Ka Gham Sah Chuka Hai,
Ye Mazloom Pehle Se Toota Hua Hai.
Akhi Ka Woh Seena Ghamon Se Bhara,
Jahan Shimr Ne Apna Zanu Rakha Hai.
Bahut Ghut Raha Hoga Mera Baradar.
Sada Meri Sunte Nahin Zulm-Zade,
Kaise Ran Mein Aawaaz Ye Ghamzada De.
Kahan Hain Mere Sher Dil Shahzade,
Koi Phir Se Aun-o-Muhammad Ko La De.
Woh Rakh Dein Gala Mamu Jaan Ke Gale Par.
Chalata Raha Kund Khanjar Sitamgar,
Tadapti Rahi Shah-e-Wala Ki Dukhtar.
Kabhi Dekhti Thi Sakina Ki Janib,
Kabhi Dekhti Thi Woh Dariya Ki Janib.
Sada De Rahi Thi Tadap Kar Woh Muztar,
Bata De Koi Mere Ghazi Se Ja Kar.
Sakina Ki Haalat Ajab Ho Rahi Hai,
Pidar Ke Gale Par Chhuri Dekh Li Hai.
Ise Khoon Rulane Pe Zaalim Tula Hai,
Ye Choti Hai, Daagh-e-Yateemi Bada Hai.
Sitamgar Ke Khanjar Ka Dar Maar Dega,
Sakina Ko Daagh-e-Pidar Maar Dega.
Nadeem Eliya, Ran Mein Ek Shoor Utha,
Ae Logo Hua Qatl Zahra Ka Jaaya.
Karo Badh Ke Pamaal Sarwar Ka Laasha,
Suw-e-Dasht Daudi Ye Sunte Hi Dukhiya.
Ye Keh Ke Giri Munh Ke Bal Bint-e-Haidar,
Koi Mere Bhai Ko Aa Kar Bacha Le.
