14/05/2021
dasht-e-viġhā meñ nūr-e-ḳhudā kā zuhūr hai
zarroñ meñ raushnī-e-tajallī-e-tūr hai
ik āftāb-e-ruḳh kī ziyā duur duur hai
kosoñ zamīn aks se dariyā-e-nūr hai
allāh-re husn tabqa-e-ambar-sarisht kā
maidān-e-karbalā hai namūna bahisht kā
hairāñ zamīñ ke nuur se hai charḳh-e-lājvard
mānind-e-kahrubā hai ruḳh-e-āftāb-e-zard
hai rū-kash-e-fazā-e-iram vādi-e-nabard
uThtā hai ḳhaak se tataq-e-nūr jā-e-gard
hairat se hāmilān-e-falak un ko takte haiñ
zarre nahīñ zamīñ pe sitāre chamakte haiñ
hai āb-e-nahr sūrat-e-ā.īna jalva-gar
tābāñ hai misl-e-chashma-e-ḳhurshīd har bhañvar
lahreñ bisān-e-barq chamaktī haiñ sar-ba-sar
paanī pe machhliyoñ kī Thahartī nahīñ nazar
ye āb-o-tāb hai ki guhar aab aab haiñ
dariyā to āsmāñ haiñ sitāre hubāb haiñ
partav-fagan huā jo ruḳh-e-qibla-e-anām
mash.hūr ho ga.ī vo zamīñ arsh-ehtishām
aur sañg-reze durr-e-najaf ban ga.e tamām
sahrā ko mil gayā sharaf-e-vādī-assalām
kaabe se aur najaf se bhī izzat sivā huī
ḳhaak us zamīn-e-pāk kī ḳhāk-e-shifā huī
phailā jo nūr-e-mahr-e-imāmat dam-e-zavāl
zarroñ se vaañ ke aañkh milānā huā muhāl
saare nihāl faiz-e-qadam se hue nihāl
aḳhtar bane jo phuul to shāḳheñ banīñ hilāl
patte tamām ā.īna-e-nūr ho ga.e
sahrā ke naḳhl sab shajar-e-tūr ho ga.e
ġhul thā zahe husain kī shaukat zahe vaqār
goyā khaḌe haiñ jañg ko mahbūb-e-kirdgār
ruḳh se ayaañ hai dabdaba-e-shāh-e-zul-fiqār
hai nūr-e-haq jabīn-e-munavvar se āshkār
kyūñkar chhupe na māh-e-do-hafta hijāb se
chauda tabaq meñ nuur hai us āftāb se
ye rū-e-raushan aur ye gesu-e-mushk-e-fām
yaañ shaam meñ to sub.h hai aur sub.h meñ hai shaam
haale meñ yuuñ nazar nahīñ aatā hai mah tamām
qudarat ḳhudā kī nuur kā zulmat meñ hai maqām
zulfoñ meñ jalva-gar nahīñ chehra janāb kā
hai nisf shab meñ aaj zuhūr āftāb kā
qurbāñ kamān-e-abrū-e-maulā pe jaan o dil
gar māh-e-nau kaheñ to hai tashbīh mubtazil
chashm-e-ġhazāl-e-dasht-e-ḳhutan chashm se ḳhajil
dekhā jise karam se ḳhatā.eñ huiiñ bahil
putlī bisān-e-qibla-numā be-qarār hai
giryāñ haiñ vo ye gardish-e-lail o nahār hai
ruḳhsār haiñ ziyā meñ qamar se ziyāda-tar
jin par Thahar sakī na kabhī shams kī nazar
rīsh-e-moḳhazzab aur ye ruḳh-e-shāh-e-bahr o bar
paidā haiñ saaf ma.anī-e-val-lailo-o-val-qamar
qur.ān se ayaañ hai buzurgī imaam kī
khaa.ī qasam ḳhudā ne isī sub.h o shaam kī
kis muñh se kījiye lab-e-jān-baḳhsh kā bayāñ
chūsī jinhoñ ne ahmad muḳhtār kī zabāñ
kyā durr-e-āb-dār haiñ is durj meñ nihāñ
goyā ki motiyoñ kā ḳhazāna hai ye dahāñ
zarre zamīñ pe aks se saare chamak ga.e
jis vaqt ye khile to sitār chamak ga.e
sham-e-harīm-e-lam-yazalī thā gulū-e-shāh
tārīk shab meñ jaise huvaidā ho nūr-e-māh
ai charḳh-e-be-madār ye kaisā sitam hai aah
shamshīr-e-shimr aur mohammad kī bosa-gāh
jis par rasūl hoñToñ ko malte hoñ pyaar se
kaT jaa.e karbalā maiñ vo ḳhanjar kī dhaar se
manzūr yaañ thī mad.h-e-gulū-e-shah-e-umam
yaad aa ga.ī magar ye hadīs-e-ġham-o-alam
masjid meñ jalva-gar the rasūl-e-falak-hasham
malte the zikr-e-haq meñ lab-e-pāk dam-ba-dam
raushan the bām-o-dar ruḳh-e-raushan ke nuur se
ā.īna ban ga.ī thī zamīñ tan ke nuur se
thā jo sutūñ ki rukn-e-risālat kā takiya-gāh
kursī bhī us kī pusht kī thī DhūñDhtī panāh
thā jis hasīr par vo do aalam kā bādshāh
hasrat se arsh kartā thā us farsh par nigāh
auj-e-zamīñ bahisht-e-barīñ se do-chand thā
mimbar kā nuh falak se bhī paaya buland thā
as.hāb-e-ḳhās gird the anjum kī tarah sab
tābāñ thā biich meñ vo mah-e-hāshmī-laqab
sar par malak-sifāt magas-rāañ the do arab
jibrīl tah kiye hue the zānu-e-adab
ḳhādim bilāl-o-qumbar-e-gardūñ-asās thā
nālain is ke paas asā us ke paas thā
gesū the vo mufassir-e-vallail-izā-sajā
ruḳh se ayaañ the ma.anī-e-vashshams-o-va-zzuhā
vo rīsh-e-pāk aur ruḳh-e-sardār-e-ambiyā
goyā dharā thā rehl pe qur.āñ khulā huā
oḌhe siyah abā jo vo ālam-panāh thā
kaaba kā saaf hājiyoñ ko ishtibāh thā
pahlū meñ bādshāh ke thā jalva-gar vazīr
sardār-e-dīñ alī-e-valī ḳhalq kā amiir
donoñ jahāñ meñ koī na donoñ kā thā nazīr
ahmad the āftāb to haidar mah-e-munīr
zāhir meñ ek nuur kā do jā zuhūr thā
gar ġhaur kījiye to vahī ek nuur thā
masrūf-e-vāz-o-pand the sultān-e-mashriqain
jo ghar se nikle khelte zohrā ke nuur ain
naanā baġhair donoñ navāsoñ ko thā na chain
baḌh jaate the hasan kabhī aage kabhī husain
kahte the dekheñ kaun qadam jald uThātā hai
naanā ke paas kaun bhalā pahle jaatā hai
vo gore gore chehroñ pe zulfeñ idhar udhar
aḳhtar se vo chamakte hue kaan ke guhar
rashk-e-hilāl tauq gale ġhairat-e-qamar
haikal pe naqsh naam ḳhudā-e-jalīl ke
tāvīz gardanoñ pe par-e-jibrīl ke
masjid meñ aa.e hañste hue jab vo gul-badan
ḳhushbū se sehan-e-masjid-e-jāme banā chaman
taslīm ko husain se pahle jhuke hasan
ḳhush ho ke muskurāne lage sarvar-e-zaman
baḌh baḌh ke ḳham salām ko chhoTe baḌe hue
baiThe rahe rasūl malak uTh khaḌe hue
beToñ ko thā alī kā ishāra ki baiTh jaao
lāzim nahīñ ki vaaz meñ naanā ko tum satāo
phailā ke haath bole mohammad ki aao aao
shabbīr ne kahā hameñ pahle gale lagāo
bhaa.ī hasan jo aap kī godī meñ aa.eñ ge
ham tum se naanā jaan abhī ruuTh jaa.eñ ge
bole hasan ki vaah hameñ aur kareñ na pyaar
iqrār ke chuke haiñ shahanshāh-e-nām-dār
bole ba-chashm-e-nam ye husain-e-falak-vaqār
dekheñ to kaun kāñdhe pe hotā hai ab savār
sab se sivā jo haiñ so hamīñ un ke pyāre haiñ
aage na baḌhiye aap ki naanā hamāre haiñ
bhaa.ī se tab kahā ye hasan ne ba-iltifāt
be-vaj.h ham se rūThe ho tum ai niko-sifāt
naanā hamāre kyā nahīñ sultān-e-kā.enāt
hotī hai nāgavār tumheñ to zarā sī baat
ġhussa na itnā chāhiye ḳhush-ḳhū ke vāste
machle the yuuñ hī bachcha-e-āhū ke vāste
ye sun ke muñh alī kā lage dekhne rasūl
hañs kar kahā ye donoñ haiñ mere chaman ke phuul
maiñ chāhtā huuñ ek kī ḳhātir na ho malūl
ro.eñge ye to ghar se nikal aa.egī butūl
hove na rañj mere kisī nūr-e-ain ko
tum lo hasan ko god meñ maiñ luuñ husain ko
shabbar se phir ishāra kiyā ho ke be-qarār
ġhussa na khaao pahle tumhīñ ko kareñge pyaar
phir bole dekh kar sū-e-shabbīr-e-nām-dār
aa ai husain aa tirī bātoñ ke maiñ nisār
chhātī se ham lagā.eñge jaan apnī jaan kar
dekheñ to pahle kaun lipaTtā hai aan kar
dauḌe ye baat sun ke barābar vo ḳhush-sayar
paas aa.e āftāb-e-risālat ke do qamar
lipTe husain hañs ke idhar aur hasan udhar
the paañv zānūoñ pe to bālā-e-dosh sar
naanā ke saath pyaar meñ donoñ kā saath thā
gardan meñ ek un kā aur un kā haath thā
phir phir ke dekhte the shahanshāh-e-mashriqain
gah jānib-e-hasan to kabhī jānib-e-husain
baiThe jo zānūoñ pe vo zehrā ke nūr-e-ain
thā tan ko lutf qalb ko rāhat jigar ko chain
jhuk jhuk ke muñh rasūl-e-zaman chūmne lage
in kā galā to un kā dahan chūmne lage
shabbīr chāhte the ki chūmeñ mire bhī lab
par kuchh gale ke bosoñ kā khultā na thā sabab
naanā ke muñh ke paas ye laate the muñh ko jab
jhuk jhuk ke chūmte the galā sayyad-e-arab
bhaa.ī ko dekh kar jo hasan muskurāte the
ġhairat se un kī āñkhoñ meñ aañsū bhar aate the
uTThe husain zānū-e-ahmad se ḳhashm-gīñ
ġhusse se rañg zard aur āñkhoñ pe āstīñ
ruḳh par pasīna jism meñ ra.asha jabīñ pa chiiñ
pūchhā kidhar chale to ye bole kahīñ nahīñ
ghar meñ akele tevarī chaḌhā.e chale ga.e
dekhā na phir ke sar ko jhukā.e chale ga.e
baitushsharf meñ aa.e jo shabbīr-e-nām-dār
kurte ko muñh pe rakh ke lage rone zār-zār
dauḌīñ ye kah ke fāima-zehrā jigar-figār
hai hai husain kyā huā tū kyuuñ hai ashk-bār
tujh ko rulā ke ġham meñ mujhe mubtalā kiyā
qurbān ho ga.ī tujhe kis ne ḳhafā kiyā
merā kaleja phahTtā hai ai dilrubā na ro
zehrā hazār jaan se tujh pe fidā na ro
sar meñ na dard ho kahīñ ai mah-laqā na ro
bas bas na ro husain barā-e-ḳhudā na ro
merī taraf to dekho ki betāb hotī huuñ
chādar se muñh ko Dhāñp ke lo maiñ bhī rotī huuñ
tū muñh to khol ai mire shabbīr-e-ḳhush-ḳhisāl
tar ho ga.e haiñ āñsuoñ se gore gore gaal
mal mal ke pusht-e-dast se aañkh karo na laal
suljhā.ūñ aao uljhe hue gesuoñ ke baal
ghar se ga.e the saath judā ho ke aa.e ho
samjhī maiñ kuchh hasan se ḳhafā ho ke aa.e ho
tum chup raho vo ghar meñ to masjid se phir ke aa.eñ
guzrī maiñ khel se mire bachche ko kyuuñ rulā.eñ
un se na boliyo vo tumheñ laakh gar manā.eñ
lo aao jaane do tumheñ chhātī se ham lagā.eñ
vaarī agar hasan ne rulāyā burā kiyā
pūchhūñgī kyā na maiñ mire pyāre ne kyā kiyā
bole husain ham to haiñ is baat par ḳhafā
naanā ne chūme bhaa.ī ke hoñT aur mirā galā
tum ammāñ-jān muñh ko to sūñgho mire zarā
kuchh bū-e-nāgavār hai mere dahan meñ kyā
bhaa.ī ke lab se apne laboñ ko milāte haiñ
ab ham na jaa.eñ ge hameñ naanā rulāte haiñ
muñh rakh ke muñh pe bolī ye zehrā jigar-figār
bū-e-gulāb aatī hai ai mere gul-azār
chūmā agar galā to ḳhafā ho na maiñ nisār
tum ko zabāñ chūsāte the mahbūb-e-kirdgār
ye mushk meñ mahak na gul-e-yāsman meñ hai
ḳhush-bū usī dahan kī tumhāre dahan meñ hai
kahne lage husain ye maañ se ba-chashm-e-nam
kyā jaano tum hasan se hameñ chāhte haiñ kam
ye kyā unhīñ pe lutf-o-ināyat hai dam-ba-dam
mālūm ho gayā unheñ pyāre nahīñ haiñ ham
ro ro ke aaj jaan ham apnī gañvā.eñge
paanī na ab piyeñge na khāne ko khā.eñge
ye baat sun ke ho gayā zehrā kā rañg faq
bolī pisar se ro ke vo bint-e-rasūl-e-haq
sadqe ga.ī karo na kaleje ko mere shaq
hai hai ye kyā kahā mujhe hotā hai ab qalaq
merā lahū bahegā jo aañsū bahāoge
kaahe ko maañ jiyegī jo khānā na khāoge
ye kah ke oḌh lī sar-e-pur-nūr par ridā
moze pahan ke god meñ shabbīr ko liyā
dar tak ga.ī jo ghar se vo dil-band-e-mustafā
fizza ne baḌh ke būzar o salmāñ ko dī sadā
pesh-e-nabī husain ko godī meñ laatī haiñ
haT jaao sab ki fātima masjid meñ aatī haiñ
allāh-re aamad āmad-e-zehrā kā bandobast
sātoñ falak the auj-e-sharāfat se jis ke past
ahmad ke gird-o-pesh se uTThe ḳhudā-parast
insāñ to kyā malak ko na thī qudarat-e-nishast
aa.iiñ to shād-shād rasūl-e-zaman hue
ghar meñ ḳhudā ke ek jagah panj-tan hue
tāzīm-e-fātima ko uThe sayyad-ul-bashar
dekhā ki chashm-e-fātima hai āñsuoñ se tar
ġham the husain dosh pe maañ ke jhukā.e sar
thā ik hilāl mahr ke pahlū meñ jalva-gar
maañ kahtī thī na rovo magar chup na hote the
āñkheñ thiiñ band hichkiyāñ le le ke rote the
ghabrā ke pūchhne lage mahbūb-e-zul-jalāl
rotā hai kyuuñ husain ye kyā hai tumhārā haal
bolīñ butūl aaj qalaq hai mujhe kamāl
royā hai ye husain ki āñkheñ haiñ donoñ laal
aate haiñ hañste rote hue ghar meñ jaate haiñ
shafqat bhī aap hī karte haiñ aap hī rulāte haiñ
hāthoñ ko joḌtī huuñ maiñ yā shāh-e-bahr-o-bar
shafqat kī us ke haal pe har-dam rahe nazar
rone se us ke hotā hai TukḌe mirā jigar
mujh fāqa-kash ġharīb kā pyārā hai ye pisar
haidar se pūchhiye mire usrat ke haal ko
kis kis dukhoñ se paalā hai is naunihāl ko
ashk us ke jitne Tapke haiñ yā shāh-e-nek-ḳhū
utnā hī ghaT gayā hai mire jism kā lahū
ro.e haiñ phuuT phuuT ke ye mere rū-ba-rū
tar ho gayā hai āñsuoñ se chāñd sā gulū
dekhā na thā ye maiñ ne jo haal is kā aaj hai
hazrat to jānte haiñ ki nāzuk mizāj hai
shafqat se aaj aap ne chūme hasan ke lab
bosa liyā na un ke laboñ kā ye kyā sabab
rutbe meñ donoñ ek haiñ yā survar-e-arab
maiñ sach kahūñ ye sun ke mujhe bhī huā ojab
is ko jo ho ḳhushī to dil is kā bhī shaad ho
chhoTe se chāhiye ki mohabbat ziyād ho
aap un ke naaz uThāte haiñ yā shāh-e-bahr-o-bar
phir kis se rūTheñ aap se rūTheñ na ye agar
aksar inheñ chaḌhāyā hai hazrat ne dosh par
gesū diye haiñ nanhe se hāthoñ meñ besh-tar
rūThe the ye so qadmoñ pe sar dharne aa.e haiñ
muñh ke na chūmne kā gilā karne aa.e haiñ
ye kah ke phir husain se bolīñ ba-chashm-tar
lo jā ke ab nabī ke qadam par jhukāo sar
aa.e husain haath jo nanhe se joḌ kar
be-iḳhtiyār rone lage sayyad-ul-bashar
rah rah ke dekhte the alī o butūl ko
nazdīk thā qalaq se ġhash aa.e rasūl ko
thī āñsuoñ se rīsh-e-mubārak tamām nam
fart-e-bukā se ḳhaak pa jhukte the dam-ba-dam
gaahe sutūñ se lag ke hue raast gaah ḳham
har lahza iztirāb ziyāda thā sabr kam
ho saktā thā na zabt shah-e-mashriqain se
rote the baar baar lipaT kar husain se
shabbīr ro ke kahte the naanā na roiye
ro.eñge ab na ham shah-e-vālā na roiye
hilne lagegā arsh-e-muallā na roiye
phaTtā hai ab hamārā kaleja na roiye
sau baar din meñ ham to muñh ashkoñ se dhote haiñ
hazrat hamāre rone pe kaahe ko rote haiñ
ghabrā ga.e alī-e-valī shāh-e-bahr-o-bar
kī arz fātima ne jhukā ke qadam pe sar
beTī nisār ho ga.ī yā sayyad-ul-bashar
kyā vaj.h hai jo aap haiñ is tarah nauha gar
jaldī batā.iye ki mujhe taab ab nahīñ
ronā ḳhudā ke dost kā ye be-sabab nahīñ
hazrat ko ilm-e-ġhaib hai yā shāh-e-ins-o-jāñ
ā.inda o guzishta kā sab haal hai ayaañ
kyā aa.ī aaj vahī-e-ḳhudāvand-e-do-jahāñ
honā hai jo husain pe mujh se karo bayāñ
fāqoñ se kāTtī huuñ musībat jahān kī
kyuuñ bāba-jān ḳhair to hai is kī jaan kī
bole jigar ko thaam ke mahbūb-e-zul-jalāl
tujh se sunā na jā.egā ai fātima ye haal
kis muñh se maiñ kahūñ ki qalaq hai mujhe kamāl
zehrā shahīd hue hoveñge tere ye donoñ laal
mātam kī ye ḳhabar abhī jibrīl laa.e the
saare malak husain ke purse ko aa.e the
almās pī ke huegā be-jāñ tirā hasan
ye vaj.h hai ki chūmtā huuñ us kā maiñ dahan
bhar jā.egā kalejoñ ke TukḌoñ se sab lagan
hogā zamurradī tire is laal kā badan
sū-e-bahisht jab ye jahāñ se sidhāreñge
bad-kesh tiir is ke janāze pa māreñge
zehrā mujhe kalām kī tāqat nahīñ hai ab
halq-e-husain chūmne kā kyā kahūñ sabab
ik ban meñ tiin roz raheñge ye tishna-lab
kaT jā.egā galā yahī ḳhanjar se hai ġhazab
neze pe sar chaḌhegā tire nūr-e-ain kā
ghoḌoñ se rauñd Dāleñge lāsha husain kā
ro.e ḳhabar ye kah ke jo mahbūb-e-zul-minan
ghabrā ke muñh husain kā takne lage hasan
zehrā pukārī haa.e luTegā mirā chaman
maiñ mar ga.ī duhā.ī hai yā sarvar-e-zaman
ye kaisī aag hai ki mirī kokh jal ga.ī
hai hai chhurī kaleje pe zehrā ke chal ga.ī
fariyād yā-nabī shah-e-abrār al-ġhiyās
ai mursilān-e-haq ke madad-gār al-ġhiyās
ai be-kasoñ ke vāris o sardār ul-ġhiyās
qudarat hai sab tarah kī shah-e-mashriqain ko
hazrat se lūñgī apne hasan aur husain ko
kis jurm par ye laal mire qatl hoñge aah
ro kar kahā rasūl-e-ḳhudā ne ki be-gunāh
kī arz fātima ne ki ai arsh-e-bār-gāh
bachchoñ ko mere kyā na milegī kahīñ panāh
talvāreñ kheñch kheñch ke zālim jo ā.eñge
hazrat na kyā navāsoñ ko apne bachā.eñge
āsāñ hai kyā jo qatl kareñge sitam-shi.ār
kyā sher-e-haq kamar se na khīñcheñge zul-fiqār
aadā pe kyā chalegā na dast-e-ḳhudā kā vaar
bāloñ ko kyā na kholegī zehrā jigar figār
TukḌe jigar jo huegā mujh dil do-nīm kā
paaya na kyā hilā.ūñgī arsh-e-azīm kā
zehrā se ro ke kahne lage shāh-e-nek-ḳhū
beTī mujhe satā.eñge turbat meñ kīna-jū
is vaqt qatl hoveñge ye donoñ māh-rū
duniyā meñ jab na hogā alī aur na maiñ na tū
lāshe pe mujtabā ke tū shabbīr ro.egā
shabbīr jab maregā to koī na huegā
chillā.ī sar paTak ke ye zehrā ki hai sitam
pīTegā kaun tan se jo niklegā us kā dam
mātam kī saf bichhā.egā kaun ai shah-e-umama
purse ko kaun aa.egā us ke ba-chashm-e-nam
ham meñ se aise vaqt jo koī na huegā
hai hai mire husain ko phir kaun ro.egā
bachche kī mere tāziya-dārī karegā kaun
muñh Dhāñp Dhāñp girya-o-zārī karegā kaun
dariyā-e-ashk chashm se jaarī karegā kaun
imdād bād-e-marg hamārī karegā kaun
hogā kahāñ nabī ke navāse kā fātiha
sharbat pe kaun devegā pyāse kā fātiha
bole nabī ki aap ko zehrā na kar halāk
farmā chukā hai mujh se ye va.ada ḳhudā-e-pāk
paidā kareñge qaum ik aisī ba-rū-e-ḳhāk
jo raat din raheñge isī ġham meñ dard-nāk
bazm-e-azā meñ ā.eñge vo duur duur se
tan ḳhaak se banā.eñge dil un ke nuur se
hogī unhīñ se majlis-e-mātam kī zeb-o-zain
deñge unheñ vo lab ki rahe jis pe vā husain
āñkheñ vo deñge rone ko samjheñ jo farz-e-ain
haath aise ġhair sīna-zanī ho jinheñ na chain
sāmān tāziyat ke kabhī kam na hoveñge
vo hashr tak husain ke mātam meñ ro.eñge
hogā ayaañ falak pe moharram kā jab hilāl
raḳht-e-siyāh pahneñge bar meñ vo ḳhush-ḳhisāl
kholeñgī bībayāñ bhī sab apne saroñ ke baal
har ghar meñ hogā shor ki hai hai alī kā laal
leñge sile meñ ḳhuld tire nūr-e-ain se
aañsū aziiz vo na kareñge husain se
pyāsā shahīd hogā jo terā ye dil-rubā
momin sabīleñ rakkheñge paanī kī jā-ba-jā
hovegī shaad ruuh shahīdān-e-karbalā
bhar bhar ke āb-e-sard pukāreñge barmalā
mahbūb-e-kibriyā ke navāse kī nazr hai
pyāse na jā.iyo ki ye pyāse kī nazr hai
kahne lagī nabī se butūl-e-falak-janāb
hai hai maiñ kyā karūñ mire dil ko nahīñ hai taab
ai bādshāh-e-kaun-o-makāñ mālikur-riqāb
dargāh-e-haq meñ aap kī hai arz mustajāb
kiije duā ki ḳhāliq-e-akbar madad kare
allāh ye balā mire bachche kī rad kare
beTī se ro ke kahne lage shāh-e-kā.enāt
rūh-ul-amīñ ne mujh se to ye bhī kahī hai baat
chāho to rad kare ye balā rabb-e-pāk-zāt
lekin na huegī mire ummat kī phir najāt
mahbūb-e-haq nisār tire nūr-e-ain par
mauqūf hai ye amar to qatl-e-husain par
allāh-re sabr-e-mahbūb-e-kirdgār
ummat kā naam sun ke jhukāyā sar ek baar
ḳhush-nūd ho ke kahne lage shāh-e-zul-fiqār
sadqe hasan husain tasadduq alī nisār
is raah meñ na maal na daulat aziiz hai
pyāre pisar nahīñ hameñ ummat aziiz hai
kahne lage husain se phir shāh-e-bahr-o-bar
batlā mujhe ki kyā tirī marzī hai ai pisar
naanā se bole chhoTe se hāthoñ ko joḌ kar
ummat ke kaam aa.e to hāzir abhī hai sar
va.ada ko ham na bhūleñge go ḳhurd-sāl haiñ
chhoTe nahīñ haiñ muḳhbir-e-sādiq ke laal haiñ
rote haiñ aap kis liye yā sayyad-e-umam
raazī haiñ ham pe rāh-e-ḳhudā meñ hoñ jo sitam
talvāreñ bhī chaleñ to nahīñ mārne ke dam
ummat pe apne sar ko tasadduq kareñge ham
ham rāst-go haiñ baat pe jis vaqt aate haiñ
kahte haiñ jo zabāñ se vahī kar dikhāte haiñ
bachpan meñ jo zabāñ se kahā thā kiyā vo kaam
jis vaqt ran meñ TuuT paḌe shah pe fauj-e-shām
gardan jhukā ke barchhiyāñ khāyā kiye imaam
ḳhuuñ meñ qabā rasūl kī tar ho ga.ī tamām
teġheñ alī ke laal ke shāne pe chal ga.iiñ
chhātī ke paar nezoñ kī nokeñ nikal ga.iiñ
pherī na thī jo pusht-e-mubārak dam-e-masāf
the do hazār zaḳhm faqat sar se tā-ba-nāf
sayyad se be-vatan se zamāna thā bar-ḳhilāf
ġhul thā ki aaj hotā hai ghar fātima kā saaf
sambhlā na jā.egā ḳhalaf-e-bū-turāb se
lo vo qadam husain ke nikle rikāb se
meñh kī tarah barasne lage shāh-e-dīñ pe tiir
tharrā rahe the lag ke tan-e-nāznīñ pe tiir
dāman pe tiir jaib pe tiir āstīñ pe tiir
pahlū pe teġh siina pe neza jabīñ pe tiir
dāġhoñ se ḳhuuñ ke raḳht-e-badan lāla-zār thā
shakl-e-zarīh sīna-e-aqdas figār thā
tar thī lahū meñ zulf-e-shikan-dar-shikan judā
majrūh lāl-e-lab the judā aur dahan judā
darpai the neza-dār judā teġhzan judā
kaT kaT ke ho gayā thā har ik uzv-e-tan judā
sī-pāra thā na sadr faqat us janāb kā
purze varaq-varaq thā ḳhudā kī kitāb kā
kartā thā vaar barchhiyoñ vāloñ kā jab parā
teġhoñ se dam bhī lene kī mohlat na thī zarā
nezoñ meñ ḳhuuñ nabī ke navāse kā thā bharā
shamshīr-o-tīr neza-o-ḳhanjar ke māvarā
thiiñ saḳhtiyāñ sitam kī shah-e-ḳhush-ḳhisāl par
chalte the sañg fāima-zehrā ke laal par
the do hazār jism-e-shah-e-bahr-o-bar pe zaḳhm
māthe pe zaḳhm tiir ke teġhoñ ke sar pe zaḳhm
gardan pe zaḳhm siine pe zaḳhm aur kamar pe zaḳhm
aur is ke māvarā the bahattar jigar pe zaḳhm
ghoḌe pe gah sambhalte the gah Dagmagāte the
ġhash aatā thā to hirne pe sar ko jhukāte the
ghoḌe pe jab sambhalne kī mutlaq rahī na taab
hāthoñ se baag chhūT ga.ī aur paañv se rikāb
girne lagā jo ḳhaak pe vo āsmāñ-janāb
marqad meñ be-qarār huī rūh-e-bū-turāb
ġhul thā ki ḳhaak par shah-e-kaun-o-makāñ girā
bas ab zamīñ ulaT ga.ī aur āsmāñ girā
jaltī huī zamīñ pe taḌapne lage imaam
be-kas pe zālimoñ ne kiyā aur izhdihām
us vaqt shimr se ye umar ne kiyā kalām
haañ tan se jald kaaT sar-e-sarvar-e-anām
dariyo na sun ke fāima-zehrā kī aah ko
gul kar de sham-e-qabr-e-risālat-panāh ko
ye sunte hī chaḌhā.ī sitam-gar ne āstīñ
ḳhanjar kamar se khīñch ke aage baḌhā liiñ
the qibla-rū jhuke hue sajde meñ shāh-e-dīñ
lab hilte dekhe shaah ke aayā vo jab qarīñ
samjhā ki tishnagī se jo sadme guzarte haiñ
us vaqt bad-duā mujhe shabbīr karte haiñ
jhuk kar qarīb kaan jo laayā to ye sunā
haq meñ gunāhgāroñ ke karte haiñ shah duā
jaarī zabān-e-ḳhushk pe ye hai ki ai ḳhudā
kar hājatoñ ko mere muhibboñ kī to ravā
shī.oñ kā hashr roz-e-jazā mere saath ho
merā ye ḳhūñ-bahā hai ki un kī najāt ho
ye sun ke musta.id huā vo shah ke qatl par
zaanū rakhā husain ke siine pa be-ḳhatar
gardan pe pherne lagā ḳhanjar jo bad-guhar
aa.ī sadā alī kī ki hai hai mire pisar
zehrā pukārī kuchh bhī nabī se hijāb hai
zālim ye bosa-gāh-e-risālat-ma.āb hai
kyuuñ zab.h mere laal ko kartā hai be-gunāh
kyuuñ kāTtā hai mere kaleje ko rū-siyāh
kashtī ko ahl-e-bait-e-nabī kī na kar tabāh
maiñ fātima huuñ arsh hilā.egī merī aah
huegā hashr qatl jo ye be-vatan huā
ye mar gayā to ḳhātma-e-panj-tan huā
āvāz apnī maañ kī ye zainab ne jab sunī
dauḌī nikal ke ḳheme se sar pīTtī huī
dekhā ki zab.h kartā hai hazrat ko vo shaqī
sar piiT kar ye kahne lagī vo jigar-jalī
hai hai na tiin roz ke pyāse ko zab.h kar
zālim na mustafā ke navāse ko zab.h kar
baano pukārtī thī ye kyā kartā hai la.iiñ
pyāsā hai tiin roz se haidar kā jā-nashīñ
chillātī thī sakīna ki jiine kī maiñ nahīñ
baabā ko zab.h kartā hai kyuuñ ai udū-e-dīñ
ḳhanjar na pher chāñd sī gardan pe rahm kar
abbā ko chhoḌ de mire bachpan pe rahm kar
zaḳhmoñ se chuur chuur hai zehrā kā yādgār
jis chhātī par meñ sotī thī us par hai to savār
baabā ke halq par na phirā ab chhurī kī dhaar
badle pidar ke sar ko mare tan se tū utaar
sayyad pe tishna-lab pe sitam is qadar na kar
potī huuñ fātima kī mujhe be-pidar na kar
ro kar bayāñ ye kartī thī vo soḳhta-jigar
de kar duhā.ī ahl-e-haram pīTte the sar
kartā thā zab.h shah ko vahāñ shimr-e-bad guhar
farmāte the ye shaah ki pyāsā huuñ rahm kar
paanī diyā na haa.e nabī ke navāse ko
jallād zab.h karne lagā bhūke pyāse ko
āḳhir sar-e-imām-e-umam tan se kaT gayā
chillā ke fātima ne ye zainab ko dī sadā
maidāñ se jald le ke sakīna ko ghar meñ jā
be-jurm kaT gayā tire maañ jaa.e kā galā
maarā ba-zulm shimr ne pyāse ko jaan se
maiñ laT ga.ī husain sidhāre jahān se
bas ai 'anīs' bazm meñ hai nāla-o-fuġhāñ
pūchh un ke dil se jo haiñ suḳhan-fahm nukta-dāñ
haq hai sunā nahīñ kabhī us husn kā bayāñ
goyā ki ye ḳhalīq kī hai sar-ba-sar zabāñ
sach hai ki is zabāñ ko koī jāntā nahīñ
jo jāntā hai aur ko vo māntā nahīñ
