24/06/2026

______1_______

Ae Qateel e Karbaa, Ae Qateel e Karbala

Laashe mazloom pe thi fatima Zahra ki sada

Asr e Ashoor ko mujh par yeh ajab waqt pada

Cheekhti reh gyi mein khanjar e zaalim na ruka

Shimr ne sar tera godi mein meri kaat liya 

Panjetan ka khatima zaalimo'n ne kar diya

Kis ki kha gyi nazar - Ghar mera ujar gaya

Ae qateel e karbala , Ae qateel e karbala

______2________

Chakiya'n pees ke pala tha tujhe faqoo'n mein

Chaale pad jaate the ae laal mere haathon mein

God mein leke tehalti thi tujhe Raato'n mein

Kaante aane na diye maine teri raaho'n mein

Aaj teeron se tera jism challi ho gaya

Tujh pe dukhiya maa fida, Ae shaheed e Nainawa

Ae Qateel e Karbala , Ae Qateel e Karbala

______3________

Yaad hai zere kafan apna woh sona beta

Aur tera siskia'n le le ke woh rona beta

Apna Sar peetna , Munh ashkon se dhona beta

Meri Khamoshi pe hairat zada hona beta

Kitna dil kharash tha tera girya o buka

Lakht-e-dil janaza bhi , Mera hil k reh gaya

Ae Qateel e Karbala , Ae Qateel e karbala

______4________

Tujhpe so jaa'n se thi qurbaan hamesha madar

Baad marne ke bhi zidd ki teri puri dilbar

Aa gye tere liye haath kafan se bahar

Thapkian de ke sulaane lagi mein seene par

Jism Naznee'n tera ab hai khaak par pada

Bahue.n betiya'n meri, ho rahi hain be-rida

Ae Qateel e Karbala, Ae Qateel e Karbala

______5________

Iss Kathin waqt ko Kyu kar mein guzaroo'n pyaare

Tanha marqad mein tujhe kaise Utaroo'n pyaare

Koi baaqi na raha kiski pukaroo'n pyaare

Be-kafan chor ke kis tarah sidhaaru'n pyaare

Kaise chain dun tujhe, Dukhiya maa ke meh-laqa

Mein Ghareeb ho gyi , Ae Ghareeb e Nainawa

Ae Qateel e Karbala , Ae Qateel e Karbala

______6________

Aag Khaimo'n mein Lagate hain laee'n has has kar

Ghash ke alam mein pada hai mera Aabid muztar

Kar rahe hain teri behnon'n ko aadu nange sar

Kaise saadat ki jaa kar mein bachauun chadar

Bacche Bachhe ki zubaa'n par hai ab chacha chacha

Aur Sakina dhoondti phir rahi hai jaa-baja

Ae Qateel e Karbala, Ae Qateel e Karbala

______7________

Dorte baccho'n pe daurate hain ghode aada 

Yun bhi dete hain yateemi ka jaha'n mein pursa

Bees se zyada hain bacche jinhe paamaal kiya

Iss tarah mara ke laasho'n ko tadapne na diya

Surkh dasht-e-Nainawa , Khoo'n se unke ho gaya

Be-basi pe roti hai, Dekh Aale- Mustafa

Ae Qateel e Karbala, Ae Qateel e Karbala

______8________

Sun k noha tera Shamshad malak rote hain

Yeh zamee'n wale hain kya ahle falak rote hain

Dekh kar dil mein gham e sheh ki jhalak rote hain

Gham hi aisa hai k khud sang talak rote hain

Kyu na roye'n Mustafa, Kyu na roye'n Murtaza

Chuada sadiyon baad bhi ro rhi hain Sayeda

Ae Qateel e Karbala, Ae Qateel e Karbala